नवलपरासी, असोज -६ गते देखि – हिन्दुहरूको महान चाड विजयादशमी (दशैं) नजिकिँदै गर्दा नवलपरासी पश्चिममा तयारीको माहोल चुलिएको छ। बजारहरूमा किनमेल गर्नेको भीड बाक्लिँदै गएको छ भने कपडा, जुत्ता–चप्पल, सजावटी सामग्रीदेखि पूजाआजामा प्रयोग हुने सरसामानको बिक्री बढेको छ।
शहरका मुख्य बजारहरू परासी बजार, भुमही,भुताहा,बर्दघाट,पटखौली,भटौलिया बजार लगायत ठाउँमा राति अबेरसम्म पनि पसल खुला रहने गरेका छन्। व्यापारीहरूले माग अनुसार नयाँ वस्तु भित्र्याइरहेका छन् भने उपभोक्ताहरूले उत्साहपूर्वक किनमेल गरिरहेका छन्।
मठ–मन्दिरमा पनि विशेष सजावटको काम सुरु भएको छ। दशैंको अवसरमा विशेष पूजाआजा र सांस्कृतिक कार्यक्रम गर्ने तयारी गरिएको जनाइएको छ।
सुरक्षा व्यवस्थालाई लक्षित गरी स्थानीय प्रशासनले निगरानी बढाएको छ भने सफाइ अभियान पनि चलाइएको छ। यसले गर्दा नवलपरासीमा यस वर्षको दशैं अझै रंगीन र उल्लासमय हुने अपेक्षा गरिएको छ।